“Nimravidae” франчайз дурсгалын зоос 2023 оны “Шилдэг эртний зоос” төрөлд шилдгээр шалгарлаа
![](http://bossnews.mn/wp-content/uploads/2024/06/Image-52-750x460.jpg)
Монголбанк “Койн Инвест Траст” компанитай хамтран гаргасан Амьдралын хувьсал цувралын 9 дэх франчайз дурсгалын зоос болох “Nimravidae” нь 2023 оны “Шилдэг эртний зоос” (“Best Paleo Coin Award”) төрөлд тэргүүн байрт шалгарч шагнал хүртлээ. Амьдралын хувьсал цувралын “Nimravidae” нь 38.61 мм диаметртэй, 31.1 грамм жинтэй, хэсэгчлэн улаан алтаар бүрэгдсэн мөнгөн дурсгалын зоос юм. Уг дурсгалын зоосон дээр дүрсэлсэн “Nimravidae” гэр бүл нь муураас гаралтай махчин амьтдын устаж үгүй болсон төрөл юм. Тэд 50 сая жилийн өмнө үүссэн бөгөөд анх муурын өвөг дээдэс гэж үздэг байсан бол өнөөдөр тэднийг муурын эгч дүүс гэж үздэг. Мөн Монголбанкнаас эрхлэн гаргадаг “Wild Mongolia” цувралын 4 дэх франчайз дурсгалын зоос болох “Монгол шонхор” дурсгалын зоос нь “Coin of the Year Award” буюу олон улсын шилдэг зоосны шалгаруулалтад “Шилдэг алтан зоос” (“Best Gold Coin”) төрөлд нэр дэвшлээ. Тус дурсгалын зоос нь 33 мм диаметртэй, 31.1 грамм жинтэй, цэвэр алтан юм. “Монгол шонхор” дурсгалын зоосон дээр дүрсэлсэн хурц хумстай, дэгээ хэлбэрийн хошуутай энэхүү гайхамшигт хүчирхэг махчин шонхор шувууг олон мянган жилийн өмнөөс олз агнахад ашиглаж ирсэн. Тэр тусмаа тал нутгийн нүүдэлчин овог аймгууд энэхүү уламжлалыг хадгалан үлдэж, цаашид ч өвлүүлэн үлдээхэд чухал үүрэг гүйцэтгэсэн. Дурсгалын зоос нь энэхүү сүрлэг шувууны хоёр дүр төрхийг харуулсан. Нэг тал нь шонхрын өхөөрдөм дүр төрхийг, нөгөө тал нь хурц ирмэгтэй хумстай араатан мэт дүр төрхийг харуулсан. Тус дурсгалын зоос нь Ultra High Relief smartminting® технологиор аль аль талдаа маш бодит мэт нарийн ширийн зүйлс, дүрслэлийг харуулж чадсан. Монголбанкны Эрдэнэсийн сангаас худалдаалж байгаа дурсгалын зоосны дэлгэрэнгүй мэдээллийг coin.mongolbank.mn сайтаас авах боломжтой.