Баримт 3: ШШГЕГ-ын дарга Д.Загджавын тушаалаар 359,900,000 төгрөгөөр жийп худалдан авчээ

2017 онд Хууль зүйн сайд асан Ц.Нямдорж 0101 УНҮ дугаартай шинэ загварын, бүрэн тоноглосон LEXUS-570 жийп хөлөглөн, олон нийтийн дургүйцлийг хүргээд байлаа. Тухайн үед Ц.Нямдорж сайдыг 360,000,000 /гурван зуун жаран сая/ төгрөгийн үнэ бүхий тансаг машинаар унаажуулсан “хэргийн эзэн”-ээр Шүүхийн шийдвэрийг гүйцэтгэх ерөнхий газар тодорч байв.  

Олон нийтийн шүүмжлэлээс болж Ерөнхий сайд У.Хүрэлсүх уг машиныг буцааж өгөхийг сайд асан Ц.Нямдоржид үүрэг болгон улмаар ШШГЕГ-руу буцааж байсан түүхтэй. 

Тэгвэл ШШГЕГ-руу чиглэх жийпний “жим” үргэлжилсээр байна. 

Тодруулбал, тус газрын дарга Д.Загджав шинэ он гарахаас хэдхэн хоногийн өмнө туулах чадвар сайтай хоёр ч жийп худалдан авахыг ШШГЕГ-ын Санхүү, үйлдвэр, хөрөнгө оруулалтын газрын дарга Н.Цэвэлмаад даалгажээ.

Ингээд 2020 оны 12 дугаар сарын 21, 23-ны өдрүүдэд ШШГЕГ-аас 359,900,000 /гурван зуун тавин есөн сая есөн зуун мянга/-н төгрөгийг “Монбаг” ХХК-ийн данс руу шилжүүлсэн баримт байна. Зарлагын баримтыг задалбал LAND CRUISER-200 автомашин нэг ширхгийн үнэ 179,500,000, LEXUS-570 автомашин нэг ширхгийн 179,800,000 төгрөгөөр ШШГЕГ худалдаж авсан гэсэн үг. 

Улмаар автомашинуудыг 2020.12.17-ны өдөр хүлээлгэн өгөхийг гэрээнд тусгасан байжээ. ШШГЕГ-т хоёр ч жийп нийлүүлэх тендерт ялалт байгуулсан А.Батбаяр захиралтай “Монбаг” ХХК нь 2011 онд байгуулагдсан бөгөөд ашгийн төлөө бус аж ахуйн нэгж гэж бүртгүүлжээ.  

Т.Цэлмэг /Bossnews/